ଗୋପାଳର ଡାକ୍ତର ଦେଖା
ନୂଆ ସହରରେ ଭଲ ଘରଟିଏ ଅପେକ୍ଷା ଭଲ ସ୍କୁଲ ଟିଏ କେମିତି ତା ଝିଅ ପାଇଁ ମିଳିବ ସେଇ ଚିନ୍ତାରେ ଗୋପାଳ ଜଣା ଅଜଣା ଲୋକମାନଂକ ଠାରୁ ଖବର ନେଲା | କେନ୍ଦୁଝର ରୁ କଟକ ବଦଳି ହେଇ ଆସିବାର ତିନିଦିନ ପରେ ଝିଅର ଭଲ ସ୍କୁଲରେ ନା' ଲେଖେଇ ଦେଲା | ତାପରେ ସ୍କୁଲ ପାଖାପାଖି ଗୋଟେ ଘର ଖୋଜି ଭଡାରେ ନେଇଗଲା | ସବୁ ଭଲରେ ଚାଲୁଥାଏ |
ଅଳ୍ପ ଦିନ ଭିତରେ ଅଫିସ ଲୋକେ ଗୋପାଳର କାର୍ଯ୍ୟଦକ୍ଷତା ବାବଦରେ ଜାଣିଗଲେ | ସମସ୍ତେ ତାକୁ ସମ୍ମାନ ଦେଉଥିଲେ | ଉପର ହାକିମ ବି ଦେଖିଲେ ଯେ ଏବେ କାମ କରିବାରେ ଆଉ ଡରଭୟ ନାହିଁ | ଭୁଲ୍ଭଟକା ହେଲେ ଗୋପାଲ ଫଅଟ କରି ସଜାଡି ଦବ | ମାସେ ଖଣ୍ଡେ ସବୁ ଭଲରେ ଚାଲିଲା | ତା'ପରେ ହଠାତ ତା ଝିଅ ଦିହ ଖରାପ ହେଲା | ସହରର ଦକ୍ଷ ଡାକ୍ତର କିଏ ପଚରାଉଚୁରା କରି ଠିକ୍ ଜାଗାରେ ପହଂଚିଲା |
ଭିଡ ହେଇଥାଏ | ଗୋପାଳ ବି ଅଫିସ ରେ ଠିକ୍ ସମୟରେ ପହଂଚିବା ପାଇଁ ବ୍ୟଗ୍ର ହେଉଥାଏ | ଡାକ୍ତରଂକ ଘର ଦୁଆର ଆଗରେ ଗୋଟେ ବୋର୍ଡରେ ରୋଗୀ ଦେଖିବା ସମୟ ଲେଖା ହେଇଥାଏ | ସମୟ ହେଇ ଯାଇଥାଏ ; କିନ୍ତୁ ଦୁଆର ଖୋଲି ନଥାଏ |
ଗୋପାଳ ରହି ପାରିଲାନି ; ଦୁଆରର ଚାବିକଣା ଉପରେ ଡାହାଣ ଆଖି ରଖି ଦୁଆର ଆରପଟେ କଣ ହେଉଚି ଦେଖିଲା | ଯାହା ଦେଖିଲା ତାକୁ କାହାକୁ ନକହି ରାଗରେ ତମତମ ହେଇ ବାରଣ୍ଡାରେ ଦୁଇ ମିନିଟ୍ ଏପଟ ସେପଟ ହେଲା | ଡାକ୍ତର ବାବୁ ଗୋଟେ ସାଢୀ କୁ ଲୁଙ୍ଗି ଭଳି ପିନ୍ଧି, ପନିକିରେ ପରିବା କାଟୁଥିଲେ ; ଆଉ ପାଖ ଚୌକୀ ଉପରେ ବସିଥିବା ଗୃହିଣୀ ତାଂକ ସାଂଗରେ ଗପୁ ଥିଲେ | ରାଗରେ କବାଟ ପାଖ କାନ୍ଥରେ ଲାଗିଥିବା କଲିଂଗବେଲ୍ କୁ ଗୋପାଳ ଜୋରରେ ଦବେଇ ଦେଇ ପ୍ରତିକ୍ରିୟା ଜାଣିବା ପାଇଁ ଚାବିକଣା ଉପରେ ତା ଆଖିକୁ ପୁଣିଥରେ ଥୋଇଲା |
ଡାକ୍ତରବାବୁ ଚମକି ପଡିଲେ | ବାଇଗଣ ବଦଳରେ ତାଂକ ଆଂଗୁଠି କାଟିଦେଇ ଚିତ୍କାର କଲେ | ଘର ଭିତର ମାହୋଲଟା ହଠାତ ଗରମ ହେଇଗଲା | ଆଂଗୁଠି ଉପରେ ତୁଳା ଖଣ୍ଡେ ଚିପିଧରି ଡାକ୍ତରବାବୁ କବାଟ ଖୋଲି ଦାନ୍ତ ରଗଡି ବଡ ବଡ ଆଖି କରି ଗୋଟେ ଘାଇଲା ଭାଲୁ ଭଳି ଗର୍ଜନ କରି କିଏ ଘଣ୍ଟି ବଜେଇଲା ପଚାରିଲେ | ଏତେଗୁଡେ ଲୋକ ଡରି ଚୁପଚାପ୍ ହେଇ ଜଣେଜଣ କୁ ଅନଉଥିଲେ | ଗୋପାଳ ଆଗେଇ ଆସି ସେ ଘଣ୍ଟି ବଜେଇ ଥିବା କହିଲା | ଆଉ କହିଲା " ବୋର୍ଡ ରେ ଯେଉଁ ସମୟ ଲେଖା ହେଇଚି ସେଇ ସମୟରେ ଆପଣ ନ ଆସିବାରୁ ସମସ୍ତଂକ ଅସୁବିଧା ହେଲାଣି; ମୋର ଅଫିସ୍ ସମୟ ବି ହେଇଗଲାଣି" |
ଡାକ୍ତର ବଡ ପାଟିରେ କହିଲେ " ତୁମେ କଣ ଭାରି ବଡଲୋକ; ମୁହୂର୍ତ୍ତେ ବିଳମ୍ବ ହେଲେ ତମର ଭାରି ଅସୁବିଧା ହେଇ ଯିବ ? ଏତେ ଲୋକ ତ ଶାନ୍ତ ହେଇ ଅପେକ୍ଷା କରୁଛନ୍ତି !! " ଗୋପାଳ ଝିଅ ହାତଧରି ଯିବାକୁ ବାହାରି ବଡ ପାଟିରେ କହିଲା " ଏଇ ସହରରେ ଆପଣ କଣ ଗୋଟିଏ ବୋଲି ଡାକ୍ତର ? ମୁ ଅନ୍ୟ ଡାକ୍ତର ପାଖକୁ ଯାଉଚି |"
ହଠାତ୍ ଡାକ୍ତର ବାବୁ ଲହୁଣୀ ପାଲଟି ଗଲେ; ଚଅଟ୍ କରି ଗୋପାଳ ହାତକୁ ଧରି ଭିତର ରୁମକୁ ଟାଣି ନେଇଗଲେ | ଝିଅ କୁ ଦେଖିଲେ| ଗୋପାଳ ଭାବିଥିଲା ତାକୁ ମାଗଣା ରେ ଦେଖିବେ : କିନ୍ତୁ ତାଂକ ପାଉଣା ମାଗିଲେ | ସେତେବେଳକୁ ଗୋପାଳର ରାଗ ବି ଶାନ୍ତ ହେଇ ଯାଇଥିଲା | ବିନା ଯୁକ୍ତିରେ ପଇସା ଦେଇ ଗୋପାଳ ଝିଅକୁ ଧରି ଫେରିଲା | ତା' ପରେ କିନ୍ତୁ ସେଇ ଡାକ୍ତରଙ୍କ ଦୁଆର ମାଡିଲାନି |
******
No comments:
Post a Comment