ଦେବୀ ଦର୍ଶନ
ମୁଁ
ଭୁବନେଶ୍ୱର ସହର ବକ୍ସି ଜଗବନ୍ଧୁ ନଗରର ବାସିନ୍ଦା | ବକ୍ସି ଜଗବନ୍ଧୁ ନଗର ପିପୁଲସ ଆସୋସିଏସନ ଆନୁକୂଲ୍ୟରେ ପ୍ରତିବର୍ଷ ଭଳି ଏବର୍ଷ ମଧ୍ୟ ପୂଜା ହେଉଛି
| ଦୁର୍ଗା ସପ୍ତମୀ ଦିନ ଦୁର୍ଗାମଣ୍ଡପରେ ଦେବୀ ବିରାଜମାନ ହେଲେଣି | ପ୍ରାତଃଭ୍ରମଣର ଅନ୍ତିମ ପର୍ଯ୍ୟାୟରେ ସେଇ
ବାଟ ଦେଇ ଆସିବାକୁ ମନ ହେଲା | ମଣ୍ଡପର ଅନତି ଦୂରରୁ ପେଁକାଳିର ସୁନ୍ଦର ସ୍ୱର ନିତାନ୍ତ ଶୃତିମଧୁର ବୋଧ ହେଲା
| ମଣ୍ଡପରେ
ପହଂଚି ସୂର୍ଯ୍ୟପୂଜା ପାଇଁ ପ୍ରସ୍ତୁତି ଦେଖିଲି | ଚକ୍ଷୁଦାନ ହେବ ପ୍ରାୟ ଦୁଇଘଣ୍ଟା ପରେ | ସେହି ପାବନ ନିରୋଳା ପରିବେଶରେ ଦଶ ମିନିଟ
ଅତିବାହିତ କରି ଆନନ୍ଦରେ ଘରକୁ ଫେରିଲି |
ଦୁର୍ଗାଷ୍ଟମୀ ଦିନ ସକାଳ ଛ ଟା ବେଳକୁ ଅନତିଦୂରରେ ଥିବା ଏକ
ଅପେକ୍ଷାକୃତ ନୂତନ ମଣ୍ଡପରୁ ମନ୍ତ୍ର ଆବୃତ୍ତି ହେଉଥିବା ଶୁଣି ମଣ୍ଡପ ଆଡକୁ ଗଲି | ମଣ୍ଡପ ଜନଶୂନ୍ୟ ଥିଲା | ମନ୍ତ୍ର ଉଚ୍ଚାରଣ ଡ଼ାକବାଜି ଯନ୍ତ୍ର
ମାଧ୍ୟମରେ ହେଉଥିବା ଉପଲବ୍ଧି କରି ମର୍ମାହତ ହେଲି | ହୁଏତ ଆନୁଷ୍ଠାନିକ ପୂଜାର୍ଚନା ପାଇଁ ସମୟ
ହୋଇନଥିଲା | ଆମ
ସହରର ଯେଉଁ ମନ୍ଦିର ଗୁଡିକ ପଚାଶ ବର୍ଷ ଭିତରେ ନିର୍ମିତ, ସେମାନଙ୍କ ପରିସରରେ ନିତିଦିନିଆ
ଶ୍ରଦ୍ଧାଳୁଙ୍କ ସଂଖ୍ୟା ପ୍ରାୟ ନଗଣ୍ୟ |ସନ୍ଧ୍ୟାବେଳେ ଦେବଦର୍ଶନ ପାଇଁ ଉପସ୍ଥିତ
ହେଲେ ପରିସର ଖାଁ ଖାଁ ଲାଗେ | ଆଳତି ସମୟରେ ବାଦ୍ୟ ପରିବେଷଣ ପାଇଁ ଭକ୍ତ ନଥାନ୍ତି ; ମେସିନ ର ସହାୟତା ରେ ଝାଞ୍ଜ ମୃଦଙ୍ଗ ଶବ୍ଦ
ସୃଷ୍ଟି କରାଯାଏ | କିନ୍ତୁ
ଦୁର୍ଗାପୂଜା ମଣ୍ଡପରେ ସମସ୍ତ ନୀତି ନିର୍ବାହ କରିବା ପାଇଁ ଭକ୍ତ ଓ ଶ୍ରଦ୍ଧାଳୁ ଯଥେଷ୍ଟ
ସଂଖ୍ୟାରେ ଉପଲବ୍ଧ ହେଇଥିବା ପରିଲକ୍ଷିତ ହୋଇଥାଏ | ଦୁର୍ଗାପୂଜା ଆମ ସମାଜରେ ଏକ ସାମୁହିକ
ସମାରୋହ ଭାବରେ ଗୃହୀତ ହୋଇ ଆସିଛି | କିନ୍ତୁ ଦିନକୁଦିନ ବ୍ୟୟବହୁଳ ହେଉଥିବା ଚିନ୍ତାଜନକ | ଚାକଚକ୍ୟ, ବାହ୍ୟ ଆଡମ୍ବର , ବଜାର ସଂସ୍କୃତି ଆଜି ଆମ ମଣ୍ଡପକୁ ଆକ୍ରାନ୍ତ
କରିଛି | ଏହି ଅବସରରେ ଷ୍ଟାରନାଇଟ ର ସମ୍ଭାବ୍ୟ ଜନଗହଳି ଏବଂ ଉନ୍ମାଦନା
ପରିପ୍ରେକ୍ଷୀରେ ମୋ ହିତାକାଂକ୍ଷୀ ବନ୍ଧୁ ସହରର ଅନ୍ୟତମ ପ୍ରସିଦ୍ଧ ମଣ୍ଡପରେ ସନ୍ଧ୍ୟା ପରେ ଦେବୀଦର୍ଶନ ରୁ କ୍ଷାନ୍ତ ହେବା ପାଇଁ ପରାମର୍ଶ ଦେଲେ | ସେ ନିଜ ଅନୁଭୂତି ରୁ କହୁଥିଲେ ମୀନବଜାର; ଠୁଙ୍ଗାପୁରୀ ; ଲଂକାଚପ ଓ ମଥୁରାପେଡା ର ଆକର୍ଷଣ ଅସଂଖ୍ୟ ପରିବାରକୁ ଏକତ୍ରିତ କରୁଥିବା
ଦୃଷ୍ଟିରୁ ସେହି ଜନସମୁଦ୍ରରେ ହାତଗଣା
କେତେକ ବୃଦ୍ଧ ଓ ବୃଦ୍ଧା ଅସହାୟ ବୋଧ କରୁଥିବା ଦେଖାଯାଏ |
ତାଙ୍କ
ମଣ୍ଡପ ପାଇଁ ଆନୁମାନିକ ଖର୍ଚ୍ଚ ହୁଏ ପଚାଶ ଲକ୍ଷ ଟଙ୍କା ; ଚାନ୍ଦା ଏବଂ ଦେବୀ ଦର୍ଶନ କରୁଥିବା ଭକ୍ତଂକ
ଦାନରୁ ଆଦାୟ ହୁଏ ପ୍ରାୟ ଦଶ ପ୍ରତିଶତ ଅଧିକ | ଆୟୋଜନ ଶୃଙ୍ଖଳିତ ହୋଇଥାଏ ; ପ୍ରାୟ ଦୁଇଶହ ଯୁବକ ଦକ୍ଷତାପୂର୍ବକ ଆୟୋଜନ
କରନ୍ତି ଏବଂ ଶତାଧିକ ସୁରକ୍ଷା କର୍ମଚାରୀ ମଧ୍ୟ
ନିଜ କର୍ତ୍ତବ୍ୟ ନିର୍ବାହ କରିଥାନ୍ତି | ଅଂଚଳର କେତେକ ସମ୍ମାନୀୟ ବୟସ୍କ ବ୍ୟକ୍ତି
ଏହି ଆୟୋଜନ ତଦାରଖ କରିଥାନ୍ତି |
ଷ୍ଟାରନାଇଟର ଆକର୍ଷଣ ରେ ଆମ ସ୍ଥାନୀୟ
କଳା ଓ
କଳାକାର ଅବହେଳିତ ହେଉଛି ; ଚାଓମିନ-ବର୍ଗର ପ୍ରାଧାନ୍ୟ ବଜାରରେ ଆରିସା , ଚିତୋଉ , ରସାବଳି ପହଂଚି ପାରୁନି ଯେମିତି
ମୁଖଶାଳା ର ବିଶାଳତା ଓ ଆକର୍ଷଣ ରେ ଶ୍ରଦ୍ଧାଳୁ
ଦିଅଁ ଙ୍କ ପାଖରେ ପହଂଚି ପାରୁ ନାହାନ୍ତି | ବ୍ୟକ୍ତି ବିଶେଷଙ୍କ କ୍ଷେତ୍ର ରେ ହେଉ ବା ସାମାଜିକ ସ୍ତରରେ , ଆଜି ଚେତନା ଦୁର୍ବଳ , ନିଷ୍ପ୍ରଭ ବା ସୁପ୍ତ ଅବସ୍ଥାରେ | ମାନବ ଆଜି ନିଜର ପୁନର୍ବିନ୍ୟାସ ପାଇଁ
ପ୍ରୟାସ କରିବାକୁ କୁଣ୍ଠାବୋଧ କରୁଛି | ଦେବୀଙ୍କ ଆରାଧନା ଆଜି ଅବଚେତନାର
ପ୍ରାଚୁର୍ଯ୍ୟ ଦ୍ୱାରା ଆକ୍ରାନ୍ତ | ମୁଖଶାଳା ଆଜି ମୁଖ୍ୟ, ଦିଅଁ ଆଜି ଗୌଣ | ଆମକୁ ଏହି ପ୍ରବାହ କୁ ପ୍ରତିରୋଧ କରିବାକୁ ହେବ ; ଉନ୍ମାଦ ପ୍ରବଣତା ଉପରେ ଅଙ୍କୁଶ ରଖିବାକୁ
ହେବ ; ଭକ୍ତି
ର ପୁନର୍ବିନ୍ୟାସ କରିବାକୁ ହେବ |
******
No comments:
Post a Comment