ନିର୍ଦ୍ଦେଶ ଦେବାପରେ ଦାୟିତ୍ୱ ମୁକ୍ତ ହେବା ମାନସିକତା

ଆଜି ପମ୍ପଷ୍ଟେସନରେ କାର୍ଯ୍ୟରତ କର୍ମଚାରୀ ଅସାବଧାନତା ବଶତଃ ଡିଜେଲ କାରରେ ପେଟ୍ରୋଲ ଭର୍ତ୍ତି କରିବା ପରେ କାର ମାଲିକ ( ମୋର ଆତ୍ମୀୟ ) ସ୍ୱାଭାବିକ ଭାବରେ କାର୍ଡ ଦ୍ୱାରା ଅର୍ଥ ପୈଠ କରି ରସିଦ ନେଇ ଗାଡି ଚଳେଇ କିଛିବାଟ ଯିବା ପରେ ଗାଡି ଚାଲିବା ବନ୍ଦ ହେଲା | ଅଗତ୍ୟା ମାଲିକ ମେକାନିକ ଡକେଇଲେ ଏବଂ ସମସ୍ୟା ର କାରଣ ଜଣା ପଡିଲା | କାରକୁ ଟଣାଯାଇ ଗ୍ୟାରେଜ ନିଆଯାଇ ପେଟ୍ରୋଲ କଢ଼ାଯିବ ; ଡିଜେଲ ଭର୍ତ୍ତି ହେବା ପରେ କାର କାର୍ଯ୍ୟକ୍ଷମ ହେବ | ବିନାଦୋଷରେ ମାଲିକ ଅନ୍ୟୁନ ସାତ ହଜାର ଟଙ୍କା ଖର୍ଚ୍ଚ କରିବେ | ମାଲିକ ଡିଜେଲ ରସିଦ ରୁ ପମ୍ପଷ୍ଟେସନ ର ଟେଲିଫୋନ ନମ୍ବର ପାଇ ଫୋନ ରେ ପମ୍ପ ମ୍ୟାନେଜରଙ୍କ ସହିତ ସମ୍ପର୍କ ସ୍ଥାପନ କରି ପାରିଲେ | ମ୍ୟାନେଜର ତତକ୍ଷଣାତ ସିସିଟିଭି କ୍ୟାମେରା ସାହାଯ୍ୟରେ ଜାଣି ପାରିଲେ ଯେ ପମ୍ପ ଅପରେଟରଙ୍କ ଅସାବଧାନତା ଯୋଗୁଁ କାର ରେ ପେଟ୍ରୋଲ ବଦଳରେ ଡିଜେଲ ଭର୍ତ୍ତି ହୋଇଛି | ମ୍ୟାନେଜର ସମସ୍ତ ଖର୍ଚ୍ଚ ବହନ କରିବାକୁ ସମ୍ମତି ଦେଲେ ଏବଂ କାର ରେ ଆବଶ୍ୟକ ଡିଜେଲ ଭର୍ତ୍ତି କରି କାରକୁ ମାଲିକଙ୍କୁ ଫେରାଇବା ପାଇଁ ବ୍ୟବସ୍ଥା କଲେ | ବାଙ୍ଗାଲୋର ମହାନଗରୀ ରେ ଆଜି ସକାଳର ଏହି ଘଟଣା ଏକ ସାମାନ୍ୟ ଦୁର୍ଘଟଣା ଭାବରେ ଗ୍ରହଣ କରା ଯାଇପାରେ ; କିନ୍ତୁ ଏହା ଆମ ସମସ୍ତଙ୍କ ପାଇଁ ଏକ ଶିକ୍ଷଣୀୟ ଅନୁଭୂତି | ଏହାକୁ ଆମେ ଏକ ସତର୍କ ଘଣ୍ଟି ଭାବରେ ଗ୍ରହଣ କରିବା ଯଥାର୍ଥ ହେବ | ଦୈନଦିନ ଜୀବନରେ ଆମେ ଅନେକ କାର୍ଯ୍ୟ ପାଇଁ ବିଭିନ୍ନ ବ୍ୟକ୍ତିଙ୍କ ସହାୟତା ନେଉଥାଇ | ଯେପରି ପାଚକ/ପାଚିକା ଆମ ପାଇଁ ଖାଦ୍ୟ ପ୍ରସ୍ତୁତ କରନ୍ତି | ଆମେ ତାଙ୍କୁ ନିର୍ଦେଶ ଦେଇ ଅନ୍ୟ କାମରେ ବ୍ୟସ୍ତ ରହୁ | ପାଚକର ମାନସିକ ସ୍ଥିତି ସମ୍ପର୍କରେ ଆମେ ଉଦାସୀନ ରହୁ | ସେ କୌଣସି କାରଣରୁ ବିଚଳିତ ଅଛି ବା ନାହିଁ ସେ ବିଷୟରେ ଆମ ଅଜ୍ଞ ରହୁ | ଚିନ୍ତିତ ଅବସ୍ଥାରେ ପାଚକ ହୁଏତ ଆମ ନିର୍ଦ୍ଦେଶ ତାମିଲ କରି ପାରି ନଥାଏ ; ହୁଏତ ଲୁଣ ବଦଳରେ ଚିନି ବ୍ୟବହାର କରି ଥାଇ ପାରେ | ଆମେ ନିର୍ଦ୍ଦେଶ ଦେବାପରେ ଦାୟିତ୍ୱ ମୁକ୍ତ ହେବା ମାନସିକତା ପରିତ୍ୟାଗ କରିବା ନିତାନ୍ତ ଆବଶ୍ୟକ | ପାଚକ/ପାଚିକା କାମ କରୁଥିବା ସମୟରେ ମଝିରେ ମଝିରେ ତାଙ୍କ କାମ ତଦାରଖ କରିବା ଆବଶ୍ୟକ | ଏହା ଏକ ଉଦାହରଣ ମାତ୍ର | ପ୍ରତ୍ୟେକ କ୍ଷେତ୍ରରେ ଅନୁରୂପ ସତର୍କତାର ଆବଶ୍ୟକତା ରହିଛି | ********

ଓଡ଼ିଶାରେ ମହିଳା ସଶସ୍ତ୍ରୀକରଣ

ମହିଳା ମାନଙ୍କ ସ୍ୱୟଂ ସହାୟକ ଗୋଷ୍ଠୀ କେବଳ ଓଡ଼ିଶାରେ ସୀମିତ ନୁହେଁ | ପ୍ରତ୍ୟେକ ରାଜ୍ୟରେ ଏହି ବ୍ୟବସ୍ଥା ରହିଛି | ଆମ ରାଜ୍ୟରେ ଏମାନଙ୍କ ସଂଖ୍ୟା ପ୍ରାୟ ୪.୪୫ ଲକ୍ଷ ଥିବାବେଳେ ପଶ୍ଚିମ ବଙ୍ଗରେ ପ୍ରାୟ ୮.୬୭ ଲକ୍ଷ ଗୋଷ୍ଠୀ କାର୍ଯ୍ୟରତ | ଦେଶସାରା ଏହି ଗୋଷ୍ଠୀମାନେ ପ୍ରାୟ ଏକ ପ୍ରକାର କାର୍ଯ୍ୟରେ ନିୟୋଜିତ | ମହିଳା ସଶସ୍ତ୍ରୀକରଣ କାର୍ଯ୍ୟକ୍ରମ କେବଳ ଓଡ଼ିଶାରେ ଅନନ୍ୟ କହିବା ବୋଧହୁଏ ପ୍ରଚାରଧର୍ମୀ ହେବ | ଆମ ରାଜ୍ୟ ସରକାରଙ୍କ ମହିଳା ଶକ୍ତି ଅଭ୍ୟୁଦୟ କାର୍ଯ୍ୟକ୍ରମର ବିଶେଷତ୍ୱ କଣ ? ଏଠି ମଦର ପ୍ରସାର ତୀବ୍ର, ଯାହା ମହିଳାଙ୍କ ସୁରକ୍ଷା ପରିପନ୍ଥୀ :ଅସଂଖ୍ୟ ପରିବାର ଆଜି ମଦ ପ୍ରସାର ଫଳରେ ବିପନ୍ନ | ମହିଳାଙ୍କ ଶିଶୁ ଆଜି ନିଖୋଜ ବା ଅତ୍ୟାଚାରିତ | ଶୌଚାଳୟ ବ୍ୟବସ୍ଥା ଶୋଚନୀୟ | ଏହିଭଳି ଚରମ ଅବ୍ୟବସ୍ଥା ପରିପ୍ରେକ୍ଷୀରେ ଓଡ଼ିଶାର ନାରୀ ସଶସ୍ତ୍ରୀକରଣ କିଭଳି ଆଜି ଦେଶପାଇଁ ଅନୁକରଣୀୟ ହୋଇଛି ତାହା ବିଚାର୍ଯ୍ୟ | ଆମେ ଏକ ସବଳ ପ୍ରଚାର ଧର୍ମୀ ରଣକୌଶଳ ଅବଲମ୍ବନ କରି ରାଜ୍ୟର ଦୁର୍ବଳ ଅସୁରକ୍ଷିତ ମହିଳା ସମ୍ପ୍ରଦାୟକୁ ଶକ୍ତିଶାଳୀ କରିବା ସମ୍ଭବ ନୁହେଁ | ଏକ ସାମାଜିକ ସହମତି ମାଧ୍ୟମରେ ରାଜ୍ୟର ନାରୀଙ୍କ ପ୍ରଗତି ସମ୍ଭବ | କେବଳ ଦଳଗତ ସ୍ଲୋଗାନ ମାଧ୍ୟମରେ ନୁହେଁ | ********

ସୋସାଲ ମିଡ଼ିଆ ରେ ଅସତ୍ୟ ପରିବେଷଣ

ସୋସାଲ ମିଡ଼ିଆ ରେ ଅସତ୍ୟ ପରିବେଷଣ ହେଉଥିବା ଆମ ରାଜ୍ୟର ପ୍ରମୁଖ ରାଜନୈତିକ ଶକ୍ତି ବୋଧ କରୁଛନ୍ତି ଏବଂ ଏହାକୁ ପ୍ରତିହତ କରି ସତ୍ୟ ପରିପ୍ରକାଶ ପାଇଁ ଯୁବଗୋଷ୍ଠୀଙ୍କୁ ପରାମର୍ଶ ଦେଇଥିବା ଖବରକାଗଜରେ ପ୍ରକାଶିତ ହୋଇଛି | ମନେହୁଏ ପ୍ରମୁଖ ରାଜନୈତିକ ଶକ୍ତି ପ୍ରିଣ୍ଟ ମିଡ଼ିଆ ବା ଇଲେକ୍ଟ୍ରୋନିକ ମିଡ଼ିଆ ମାନଙ୍କ ପ୍ରତି ସନ୍ତୁଷ୍ଟ ; କେବଳ ସୋସାଲ ମିଡିଆରେ ଉପଯୁକ୍ତ କାର୍ଯ୍ୟାନୁଷ୍ଠାନର ଆବଶ୍ୟକତା ହୃଦବୋଧ କରୁଛନ୍ତି | ରାଜ୍ୟ ସୋସାଲ ମେଡିଆରେ ଅସତ୍ୟର ପ୍ରସାର ପ୍ରସଙ୍ଗ ସମ୍ପର୍କରେ ଏକ ନିରପେକ୍ଷ ଅନୁଶୀଳନ ଆବଶ୍ୟକ ମନେହୁଏ | ଓଡିଶା ସୋସାଲ ମିଡିଆରେ ଆଜି ମୁଖ୍ୟତଃ କେଉଁ ପ୍ରସଙ୍ଗମାନ ଆଲୋଚିତ ହେଉଛି? କେତେଜଣ ଭଲ ଖାଦ୍ୟ ଫଟୋ ଦେଉଛନ୍ତି ; କେତେଜଣ ରସଗୋଲା , ପଖାଳ , ଦହିବରା ଆଳୁଦମ ର ପ୍ରଶସ୍ତି ଗାନ କରୁଛନ୍ତି ; କେତେଜଣ ନିଜ ବନ୍ଧୁଙ୍କ ସହିତ ରୁଚିପୂର୍ଣ୍ଣ ଆଳାପ କରୁଛନ୍ତି ; ମାତ୍ର କେତେଜଣ ଆମ ରାଜ୍ୟର ସୁବିଧା ଅସୁବିଧା ବ୍ୟକ୍ତ କରୁଛନ୍ତି | କେତେବେଳେ ରୋଗୀ ଖଟିଆରେ ବୁହା ହୋଇ ଡାକ୍ତରଖାନା ଯିବା ଫୋଟ ପ୍ରକାଶିତ ହେଉଛି | କେତେଜଣ ସମୟ ସମୟରେ ଯଥାର୍ଥ କାରଣ ଯୋଗୁଁ ରାଜନୈତିକ ନେତୃତ୍ୱର ଦୋଷ ଦୁର୍ବଳତା ବିଷୟରେ ଲେଖୁଛନ୍ତି | ଏହି ପୃଷ୍ଠଭୂମି ପରିପ୍ରେକ୍ଷୀରେ ବିଚଳିତ ହେବାର ଅବକାଶ କାହିଁ ? ଯୁବାଗୋଷ୍ଠୀଙ୍କୁ ସତ୍ୟପ୍ରିୟ ହେବା ପାଇଁ ପରାମର୍ଶ ଦିଆ ଯାଉଛି ଏବଂ ରାଜ୍ୟର ଓ ନେତୃତ୍ୱ ସମ୍ପର୍କରେ ବାସ୍ତବ ରୂପ ଚିତ୍ରଣ ପାଇଁ ପରାମର୍ଶ ଦିଆଯାଇଛି | ଉଚିତ ହୋଇଥାନ୍ତି ଯଦି ଛାତ୍ରଗୋଷ୍ଠୀଙ୍କୁ ଅଧ୍ୟୟନ ପ୍ରତି ଅଧିକ ଧ୍ୟାନ ଦେବା ପାଇଁ ପରାମର୍ଶ ଦିଆ ଯାଇଥାନ୍ତା ; ସୁରାପାନ ଠାରୁ ଦୂରରେ ରହିବା ପାଇଁ ନିର୍ଦ୍ଦେଶ ଦିଆ ଯାଇଥାନ୍ତା ; ଚେନ ଲୁଟେରାଂକୁ ଧରିବା ପାଇଁ ଆହ୍ବାନ ଦିଆ ଯାଇଥାନ୍ତା ; ଡ୍ରଗ ସେବନ ରୁ ବାରଣ କରା ଯାଇଥାନ୍ତା | ତାଙ୍କୁ ଗୋଡାଣିଆ ମାନସିକତା ପରିହାର ପାଇଁ ପରାମର୍ଶ ଦିଆ ଯାଇଥାନ୍ତା | ତାଙ୍କୁ ସଫଳ ନାଗରିକ ହେବା ପାଇଁ ଉପଦେଶ ଦିଆଯାଉ | ସେମାନଙ୍କୁ ଏକ ଉନ୍ନତ ରାଜ୍ୟର ସାରଥି ହେବା ପାଇଁ ପ୍ରେରଣା ଦିଆଯାଉ | *********

୨୦୨୦ ମସିହା ଡିସେମ୍ବର ମାସର କେତୋଟି କ୍ଷୁଦ୍ର ଟିପ୍ପଣୀ

1. ଆଜି କୁଣ୍ଢେଇବେଣ୍ଟ ସାହି ଲୋକ ଯିବେ; କାଲି ବାସେଳୀ ସାହି ଲୋକେ -- ଏମିତି ପାଳି କରି ଜମିରେ ପାଣି ମଡ଼ା ଯାଏ, ଦିଅଁ ଦର୍ଶନ ହୁଏନି | ଆମ ଲୋକେ ମୁହଁରେ ପଟି ଲଗେଇ ଚୁପ ରହିଲେ ଦିନକୁଦିନ ଅବ୍ୟବସ୍ଥା ବଢିବ , ହାକିମିରାଜ ବଢିବ | ଆମ ସଂସ୍କୃତି ର ଗାରିମା ଓ ସୌନ୍ଦର୍ଯ୍ୟ ରହୁ | 2. ଯେଉଁ ଅଂଚଳରେ ଅସାମର୍ଥ୍ୟର ପୁଜାରିଙ୍କ ସଂଖ୍ୟା ଯେତେ ବେଶୀ, ସେହି ଅଂଚଳ ସେତେ ଅନୁନ୍ନତ ହୋଇଥାଏ | 3. ଓଡିଶା ସରକାର କେବଳ MSP କୁ ବୃଦ୍ଧି କରିବା ଆବଶ୍ୟକ କହିଲେ ରାଜ୍ୟ ଚାଷ ବା ଚାଷୀ ଲାଭବାନ ହେବନି, ରାଜ୍ୟସରକାରଙ୍କୁ MSP ରେ କିଣି ଚାଷୀଙ୍କୁ ରକ୍ଷା କରିବା ଆବଶ୍ୟକ । ମାଂଡିଆ, ଅଳସୀ, ମୁଗ, ବୁଟ, ମକା ,ବିରି ଇତ୍ୟାଦି ଫସଲ ସରକାର କିଣିଲେ କୃଷକ ମାନଙ୍କୁ ସାହାଯ୍ୟ କରିବା ସମ୍ଭବ। ଏ ଦିଗରେ ସକ୍ରିୟତା ପ୍ରଦର୍ଶନ ନ ହେବା ଚିନ୍ତା ଜନକ । 4. ଅଶୀ ବର୍ଷ ବୟସ୍କ ମୋ ଇଞ୍ଜିନିଅର ବନ୍ଧୁ କାଲି ଅସହାୟ ସ୍ୱରରେ ମୋତେ ପଚାରିଲେ "କୋଭିଡ ପ୍ରତିରୋଧକ ଟିକା କେବେ ଆସିବ " | ତାଙ୍କୁ ଅଯଥା ଭୟ ଓ ନୈରାଶ୍ୟ ମାନସିକାତାରୁ ମୁକ୍ତ କରିବା ପାଇଁ ଟିକା ଶୀଘ୍ର ଆସୁଥିବା ଆଶ୍ବାସନା ଦେଇ ମୋ ବ୍ୟକ୍ତିଗତ ନିଷ୍ପତ୍ତି ଟିକା ନନେବା ସମ୍ପର୍କରେ କହିଲି | ମୋ ଯୁକ୍ତି ହେଲା ସମାଜରେ ମୋ ଅପେକ୍ଷା ଉପଯୋଗୀ ଏବଂ ଯୋଗ୍ୟ ବ୍ୟକ୍ତି ଟିକା ନିଅନ୍ତୁ; ମୁଁ ମୁଖା ପିନ୍ଧି, ସାମାଜିକ ଦୂରତ୍ୱ ରକ୍ଷା କରି ବାକି ଜୀବନ ବିତେଇବି | ସେ ଆଶ୍ୱସ୍ତ ହୋଇ ମୋ ମାର୍ଗ ଅବଲମ୍ବନ କରିବେ ବୋଲି କହିଲେ | 5. ଦେବ ଦୀପାବଳୀ ଅବସରରେ ପ୍ରଭୁ ଲିଙ୍ଗରାଜଙ୍କ ଭବ୍ୟ ମନ୍ଦିର ସମ୍ମୁଖରେ ସହସ୍ର ପ୍ରଦୀପ ପ୍ରଜ୍ଜ୍ୱଳନ ଏକ ସୁସ୍ଥ ପରମ୍ପରା ସୃଷ୍ଟି କରିଛି | ଆସ୍ଥାର ନିଳୟ ର ପରିବେଶ ନିର୍ମଳ , ଉଜ୍ଜ୍ୱଳ , ସମ୍ମାନୀୟ ଏବଂ ଐଶ୍ବର୍ଯ୍ୟମୟ ହେବା ଆବଶ୍ୟକ | ଏହି ମାନସିକତା ସୁଦୂରପ୍ରସାରୀ ହେଉ | ଆମ ନଦୀଘାଟ ଏବଂ ଜଳାଶୟ ଉପକଣ୍ଠ ପୂତମୟ ହେଉ, ନିର୍ମଳ ହେଉ; ଜଳସ୍ରୋତ ଶୁଦ୍ଧତାର ବାର୍ତ୍ତା ବହନ କରୁ; ନଦୀକୂଳରେ ଏବଂ ବୃହତ ଜଳାଶୟ ମାନଙ୍କର ଘାଟରେ ସନ୍ଧ୍ୟାରେ ପ୍ରଦୀପ ବନ୍ଦନା ହେଉ | ଚିଲିକା ତୀରରେ କାଳିଜାଇ ମନ୍ଦିରର ଘାଟରେ , କଟକ ଗଡ଼ଗଡ଼ିଆ ଘାଟ ଓ ଦୟାନଦୀ କୂଳରେ ଏହି ପ୍ରୟାସର ଅୟମାରମ୍ଭ ହେଉ | 6. ତିରିଶବର୍ଷ ପୂର୍ବେ ଧନୁମୁଆଁ ବହୁତ ଟାଣ ଥିଲା | ଖାଇବାରେ କସରତ କରିବାକୁ ସିନା ହେଉଥିଲା ,ସୁଆଦ କିନ୍ତୁ ଅପୂର୍ବ ଥିଲା | ତିରିଶ ବର୍ଷ ପୂର୍ବେ ମାର୍ଗଶିର ଗୁରୁବାର ପାହାନ୍ତିଆ ଅନ୍ଧାରରେ ତୁଳସୀ ଚଉରା ତଳେ ଚିତା ଦେବାବେଳେ ପ୍ରଚଣ୍ଡ ଶୀତ ହେଉଥିବା ଆଜି ମୋ ଝିଅ ମନେପକାଉଥିଲା | ଏବେ ସବୁ ଓଲଟପାଲଟ ହେଇ ଯାଇଛି | ମୁଆଁ ନରମ,ସକାଳ ଗରମ | 7. " ଘର କୋଣାର୍କ ପାଖରେ ; ପିଲାଦିନୁ ଭୁବନେଶ୍ୱର ଆସି ଦଶବର୍ଷ ବୁଲିଲି; ତା'ପରେ ଏଇଠି (ଭୁବନେଶ୍ୱର ଛ ନମ୍ବର ୟୁନିଟ }ବରା ଦୋକାନ 44 ବର୍ଷ ହେଲା କଲି |" ବରା ଛାଣୁ ଛାଣୁ ରବି ସାହୁ ମୋତେ କହୁଥିଲେ | ମୁଁ କହିଲି, "ତୁମେ ପରା ଫୁଟିଲା ତେଲରେ ହାତ ପୁରାଇ ବରା ଓଲଟେଇ ଦିଅ?" ସେ ହସି ନିଜ ହାତରେ ଛଣା ହେଉଥିବା ବରାକୁ ଏପଟସେପଟ କରିଦେଲେ | 8. ଓଡ଼ିଶାରେ ବର୍ତ୍ତମାନ ଧନୀବର୍ଗର ଅନେକ ବ୍ୟକ୍ତି ରାଜ୍ୟର ବିଭିନ୍ନ ସ୍ଥାନରେ ଫାର୍ମହାଉସ ସ୍ଥାପନ କରିଛନ୍ତି | କିନ୍ତୁ ମୁଖ୍ୟତଃ ଏଗୁଡିକ ଆମୋଦ ଉଦ୍ୟାନ ଭାବରେ ବ୍ୟବହୃତ ହେଉଛି | ଭଲ ହୁଅନ୍ତା ଯଦି ଏହି ସ୍ଥାନଗୁଡିକ ଆଦର୍ଶ କୃଷିକ୍ଷେତ୍ର ଭାବରେ ବିକଶିତ ହୋଇ ସ୍ଥାନୀୟ କୃଷି ବ୍ୟବସ୍ଥାକୁ ଅଧିକ ଅର୍ଥକାରୀ କରିବାରେ ସହାୟକ ହୁଅନ୍ତା | 9. ଚାରିଦିନ ପରେ ଗାଁରୁ ଫେରିବ କହି ଘରକାମ କରୁଥିବା ଯୁବକ ନିଜ ଲୁଗାପଟା ନେଇ ଗଲାବେଳେ ଆମେ ଭାବିଲୁ ସେ ଆଉ ଫେରିବନି ଏବଂପୁଣିଥରେ ଖୋଜା ହବ ଆଉ ଜଣେ ବିଶ୍ୱସ୍ତ ଯୁବକ | କିନ୍ତୁ ସେ ଫେରିଲା , ବରଂ ଆମପାଇଁ ଗାଁରୁ ଫୁଲକୋବି ଆଣିଥିଲା | ଖାଲି ଫୁଲତୋଡ଼ା ଆମ ପାଖରେ ନଥିଲା ; ନହେଲେ ତା ପାଇଁ ଆମ ସ୍ୱାଗତ ସମ୍ବର୍ଦ୍ଧନାରେ କୌଣସି ଊଣା ନଥିଲା | 10. ଦୋକାନରେ ଆଜି ମାଲିକ ନଥିଲେ ; ତାଙ୍କ ରାଗି ପ୍ରକୃତିର ସାନପୁଅ ଥିଲା | ମାଲିକ ସାଙ୍ଗରେ କେତେଦିନହେଲା ଗୋଟିଏ କଅଁଳିଆ ବିରାଡ଼ିଛୁଆ ଖେଳୁଥିବା ଦେଖୁଥିଲି |ମାଲିକ ବିକ୍ରିପାଇଁ ରଖିଥିବା କ୍ଷୀର ପ୍ୟାକେଟରୁ ଗୋଟିଏ ପ୍ୟାକେଟ ତା ପାଇଁ ରଖୁଥିଲେ | ଆଜି ବିରାଡ଼ିଛୁଆକୁ ଦେଖିଲିନି | ପଶୁମାନେ ମଧ୍ୟ ଜାଣନ୍ତି କିଏ ତାଙ୍କୁ ଭଲପାଏ; କିଏ ପାଏନି | 11. ଗତ ଦୀପାବଳି ରାତ୍ରିରେ ଅଯୋଧ୍ୟା ରେ ସରଜୁ ନଦୀ ଘାଟ ପ୍ରଦୀପରେ ସୁସଜ୍ଜିତ ହୋଇଥିବା ଏବଂ ଦେବଦୀପାବଳି ରାତ୍ରିରେ କାଶୀ ର ଘାଟ ଗୁଡିକ ପ୍ରଦୀପରେ ସୁସଜ୍ଜିତ ହୋଇଥିବା ଦୃଶ୍ୟ ଏକ ନୂତନ ଭାରତର ଅଭ୍ୟୁଦୟ କରୁଥିବା ଉଲ୍ଲେଖ କରିଥିଲି | କେତେକ ବନ୍ଧୁ ଏହା ପସନ୍ଦ ନକରି ନିଜ ପ୍ରତିକ୍ରୟା ବ୍ୟକ୍ତ କରିଥିଲେ |ଗତକାଲି ସୁସଜ୍ଜିତ ଏକାମ୍ରନଗର ମୁଖ୍ୟମନ୍ତ୍ରୀ ପରିଦର୍ଶନ କରୁଥିବା ଭିଡିଓ ରେ ମହାଦେବଙ୍କ ସ୍ତୁତି ସଂଗୀତ ଧ୍ୱନି ମୋତେ ଆନନ୍ଦିତ କରିଥିଲା ଏବଂ ଏହି ଦୃଶ୍ୟ ମଧ୍ୟ ନୂତନ ଭାରତର ସଂକେତ ହୋଇଥିବା ମୁଁ ଉଲ୍ଲେଖ କରିଥିଲି | ନାପସନ୍ଦ ପ୍ରତିକ୍ରିୟା ସେହି ବନ୍ଧୁ ମାନଙ୍କଠାରୁ ଆଶା କରିଥିଲି | କିନ୍ତୁ ଏପର୍ଯ୍ୟନ୍ତ କିଛି ପାଇନାହିଁ |

ସିଦ୍ଧାନ୍ତ ର ପାଠପଢା

 ଅଳ୍ପ ବୟସରେ ବିଶ୍ବର ଫୁଟବଲ ଖେଳ ବିଷୟରେ ତାର ବହୁତ ଜ୍ଞାନ ଥିଲା | ସ୍କୁଲର ବଡ଼ ପିଲା ମାନେ ତାକୁ ଏହି କାରଣରୁ ବହୁତ ସ୍ନେହ କରୁଥିଲେ | ଅତ୍ୟନ୍ତ ଲୋକପ୍ରିୟ ଛାତ୍ର ଥିଲା ସେ | ତାଠାରୁ ସାତବର୍ଷ ବଡ଼ ଭାଇକୁ ତାଙ୍କ ହାଉସିଂ କମ୍ପ୍ଲେକ୍ସରେ ବଡ଼ ବଡ଼ ପିଲା ମାନେ ସିଦ୍ଧାନ୍ତ ର  ଭାଇ ଭାବରେ ଜାଣିଥିଲେ , ଯେମିତି ବଡ଼ ଭାଇର ଅନ୍ୟ କୌଣସି ପରିଚୟ ନଥିଲା |

 ପାଠପଢ଼ାରେ କିନ୍ତୁ ମନ ଦେଉନଥିଲା | ତା ସାଙ୍ଗମାନେ ଚିନ୍ତିତ ହେଲେ | ଯଦି ସେ ଫେଲ ହେଇଯିବ ତାହେଲେ ସେ ଆଉ ତାଙ୍କ ସାଙ୍ଗରେ ପଢ଼ିପାରିବନି ନା ବେଶୀ  ସମୟ ବିତେଇ ପାରିବ | ଯାହାହେଉ , ସାଙ୍ଗଙ୍କ ପ୍ରାର୍ଥନା କାମ ଦେଲା | ସେ ପରୀକ୍ଷାରେ ଭଲ କଲା | 

କିନ୍ତୁ ସିଦ୍ଧାନ୍ତ ଆଉ ସେହି ସ୍କୁଲ ରେ ପଢି ପାରିଲାନି | ସେମାନେ ସହରର ଆଉ ଗୋଟିଏ ଅଂଚଳରେ ନୂଆଘର କଲେ ଏବଂ ସେଇ ଘର ପାଖ ସ୍କୁଲରେ ସିଦ୍ଧାଂତର ଆଡ଼ମିସନ ପାଇଁ ଯୋଜନା ହେଲା | ଦିନେ ବାପା ମାଙ୍କ ସାଙ୍ଗରେ ସେ ପ୍ରିନ୍ସିପାଲ ଓ କ୍ଳାସ ଶିକ୍ଷକଙ୍କୁ ସାକ୍ଷାତ କଲା | ତାଙ୍କ ପ୍ରଶ୍ନ ମାନଙ୍କର ସନ୍ତୋଷଜନକ ଉତ୍ତର ଦେଲା ; ଲିଖିତ ପରୀକ୍ଷରେ ମଧ୍ୟ ଭଲ କଲା | ତାକୁ ସ୍କୁଲରେ ଆଡ଼ମିସନ ମିଳିଗଲା | 

 କିନ୍ତୁ ମହାମାରି ଯୋଗୁଁ ସ୍କୁଲ ଖୋଲିଲା ନାହିଁ | ଇ କ୍ଳାସ ଆରମ୍ଭ ହେଲା | ସିଦ୍ଧାଂତର ପଢିବା ଆଗ୍ରହ ହଠାତ ବଢିଗଲା | ଠିକ ସମୟରେ ଲାପଟପ ଆଗରେ ଖାତା ବହି କଲମ ଧରି ସେ ବସିଯାଏ | ସକାଳୁ ଠିକ ସମୟରେ ଉଠିବା , ଠିକ ସମୟରେ ନିତ୍ୟକର୍ମ ସାରିବା ; ଠିକ ସମୟରେ ଜଳଖିଆ ଖାଇବା ସମସ୍ତଙ୍କୁ  ଆଶ୍ଚର୍ଯ୍ୟ କରୁଥିଲା | ଇ କ୍ଳାସ ରେ ତା ଏକାଗ୍ରତା ତା ଶିକ୍ଷକଙ୍କୁ  ମଧ୍ୟ ଆନନ୍ଦିତ  କରିଥିଲା | 

ତ୍ରୈମାସିକ ପରୀକ୍ଷାରେ ପ୍ରତ୍ୟେକ ବିଷୟରେ ୮୦ ପରସେଣ୍ଟ ରୁ ଅଧିକ ନମ୍ବର ରଖିଲା | ତା ବାପା ମା ଖୁସି ହେଲେ ; ବେଶୀ ଆଶ୍ଚର୍ଯ୍ୟ ହେଲା ତା ବଡ଼ ଭାଇ | 

ସିଦ୍ଧାନ୍ତ କୁ ସମସ୍ତେ ପଚାରିଲେ ସେ ପରୀକ୍ଷା ଫଳରେ ଖୁସି ତ ? ସେ ଗମ୍ଭୀର ହେଇ କହିଲା, "ବେଶୀ ଭଲ ହେଲାନି; ଆରଥରକୁ ବେଶୀ ନମ୍ବର ରଖିବ |"

********

୨୦୨୦ ସେପ୍ଟେମ୍ବର ମାସ ପ୍ରଥମ ଦଶଦିନ ର କେତୋଟି ବିଚାର

 

 

ବିଗତ ଦୁଇ ଦଶନ୍ଧିରୁ ଅଧିକ ସମୟ ଧରି ଓଡିଶା ଆଶାନୁରୂପ ଅଗ୍ରଗତି କରିନଥିବା କ୍ରମଶଃ ଶିକ୍ଷିତ ଯୁବାପୀଢ଼ି ହୃଦୟଙ୍ଗମ କରୁଛନ୍ତି | ନିଯୁକ୍ତି କ୍ଷେତ୍ରରେ ଅଗ୍ରଗତି ନଗଣ୍ୟ ; ରାଜ୍ୟର ଅସୀମ ପ୍ରାକୃତିକ ବୈଭବର ସିଂହଭାଗ କାରବାର ବାହାର ଲୋକଙ୍କ ହାତରେ ; ସ୍ଥାନୀୟ ଲୋକେ କଣ୍ଢେଇ, ପିଠା ରେ ଆପ୍ୟାୟିତ |ଏଇ ଦୁଇ ଦଶନ୍ଧିରେ ଓଡ଼ିଶାର ସାମୁହିକ ବିକାଶରେ ରାଜ୍ୟ ରାଜନୈତିକ ଚିତ୍ରପଟର ଜାଗୃତ ଶକ୍ତିଙ୍କ ଅବଦାନ ସନ୍ତୋଷଜନକ ନୁହେଁ | କୃଷି, ପର୍ଯ୍ୟଟନ, ଜଳସେଚନ ଅବିକଶିତ; ନିଯୁକ୍ତି କ୍ଷେତ୍ରରେ ସ୍ଥାଣୁତ୍ୱ ; ସ୍ଥାନୀୟ ଉଦ୍ୟୋଗୀ ଅବହେଳିତ | ମନେହୁଏ ଆସନ୍ତା ପଂଚାୟତ ନିର୍ବାଚନରେ ସୁପ୍ତପ୍ରାୟ ଶକ୍ତିର ପ୍ରଦର୍ଶନ ଆଶାଜନକ ହେବ |

*******

ଇଲେକ୍ଟ୍ରୋନିକ ଓ ପ୍ରିଣ୍ଟ ମିଡ଼ିଆ ବୁଝିବା ଆବଶ୍ୟକ ସମ୍ବାଦ ଥାଳିରେ ରିହା ଚକ୍ରବର୍ତୀ ପ୍ରସଙ୍ଗ ବା ଅନୁଭବ-ବର୍ଷା ପ୍ରସଙ୍ଗ ମୁଖ୍ୟ ଆଇଟମ ହେବା ଭୋଜନ ଥାଳିରେ ଲଙ୍କା ଓ ଲେମ୍ବୁ ମୁଖ୍ୟ ଆଇଟମ ହେବା ଭଳି | ଏହାଦ୍ୱାରା ଏକ ଅବାସ୍ତବ ପରିସ୍ଥିତି ସୃଷ୍ଟି ହେଉଛି  | ଏହା ଫଳରେ ପ୍ରିଣ୍ଟ ମିଡ଼ିଆ ଏବଂ ଇଲେକ୍ଟ୍ରୋନିକ ମିଡ଼ିଆ ଦ୍ରୁତଗତିରେ  ଗ୍ରହଣୀୟତା ହରାଉଛନ୍ତି |   ପ୍ରକୃତ ସମ୍ବାଦ ପାଇଁ ସୋସାଲ ମିଡ଼ିଆ ଦିନକୁଦିନ ଅଧିକ ଆକର୍ଷଣୀୟ ହେଉଛି |

ଏମିତି କେତେ ଖେଳ ଆମ ପିଲାଦିନେ ପିଲାମାନେ ଖେଳୁଥିଲେ ଯାହା ଆଜି ବୋଧହୁଏ ହଜି ଗଲାଣି । ସେମିତି ଖେଳ ମନେ ପକେଇ ତା ବିଷୟରେ ଆଲୋଚନା କରିବାକୁ ବନ୍ଧୁମାନଙ୍କୁ ଅନୁରୋଧ କରିଥିଲି  । ଏହି ଅନୁରୋଧ ପରେ ଅନେକ ବ୍ୟକ୍ତି ପିଲାଦିନ ଖେଳ ବିଷୟରେ ଲେଖିଲେ |

ଜଣେ ବାଟି/ଗୁଲି ଖେଳ ଓ  ସେକାସେକି ଖେଳ କଥା କହିଲେ | ଅନ୍ୟ ଜଣେ ସାଇକେଲର ପୁରୁଣା ଚକ କୁ ଗଡେଇ ଗଡେଇ ନେବା ପ୍ରତିଯୋଗିତା ବିଷୟ ଉଲ୍ଲେଖ କଲେ | ବହୁତ ଗୁଆ ଗଛ ଥିବା ଅଂଚଳର ଜଣେ ବନ୍ଧୁ    ପିଲାଦିନେ ଗୁଆ ବାହୁ ( ଗୁଆ ପଟିଆ) ରେ ସାଥୀ କୁ ବସେଇ ଟାଣି ଟାଣି ଗାଁ ଦାଣ୍ଡ ପ୍ରତିଯୋଗିତା ବିଷୟରେ ଲେଖିଲେ | ଆଉ ଜଣେ ଗାଁ ରେ ହେଉଥିବା ଦାଣ୍ଡିଆ ଖେଳ ବିଷୟରେ ଉଲ୍ଲେଖ କଲେ |..

ଜଣେ  ପାକିଲି ଖେଳ ବିଷୟରେ ଉଲ୍ଲେଖ କରି କହିଲେ ଏହି ଖେଳରେ  ପାଞ୍ଚ  ଜଣ ପାଞ୍ଚ  ଜଣଙ୍କୁ ଜଗନ୍ତି, ଆଠଟା  ବଡ ବର୍ଗକ୍ଷେତ୍ର ମଝିରେ ଥିବା  ଘରକୁ ଜଣେ ଓ ମଝିରେ ଲମ୍ବା ଲାଇନ କୁ ଦାଣ୍ଡିଆ ଜଗେ। ଗୋଟିଏ ଦଳର ସମସ୍ତ ସଦସ୍ୟ  ଯାଇ ଗୋଟିଏ  ଘରେ ରୁଣ୍ଡ ହେଇ ପାରିଲେ  ଜିତିବା ହୁଏ । ଛୁଇଁବା ବଦଳରେ ଶକ୍ତ ଚାପୁଡ଼ା ପିଠିରେ ବସେ । ଜଣେ ଦିଆସିଲ ଖୋଳ ଓ ଖପରା ଖେଳ କଥା ବଖାଣିଲେ ଏବଂ ଅନ୍ୟଜଣେ  ବାଘ ଛେଳି ଖେଳକଥା ; ତଳେ ଗାର କାଟି ଗୋଡି ରେ ଖେଳ ; ପତଳା ଜିଆଇ  ତାର ପଛରେ ବଗ ପର ବାନ୍ଧି ବର୍ଷା ଦିନେ "ନମ୍ବର" ଖେଳ ; ବର୍ଷା ଦିନେ ମାଟିରେ ଲୁହା ରଡ଼ ମାରି ପୋତି ଖେଳିବା ; କିତିକିତି;  ପୁଚି ; ବାଟି ବା କାଚଗୁଲି ଖେଳ ; କଉଡି ଖେଳ ;  ଲେମ୍ବୁ ଖେଳ ; ନଟୁ ଖେଳ ;  ଗାଁ ଦାଣ୍ଡରେ କୁମାର ପୁର୍ଣିମା ଖେଳ (ଆଗରୁ ପନ୍ଦର କୋଡିଏ ଦିନ  ଖେଳୁଥିଲେ, ଏବେ ଗୋଟିଏ ଦିନ ବି ଖେଳ ହେଉନି, କେବଳ ବହି ବୋଲା ହେଉଛି) ; ମନେ ପକେଇଲେ |

ଏଇସବୁ ଖେଳ ବିଷୟରେ ଜାଣିଲେ ଅନ୍ୟମାନେ ନିଶ୍ଚୟ ଏମିତି ଖେଳ ଗୁଡିକର ପୁନଃ ଆବିର୍ଭାବ ପାଇଁ ଆଗ୍ରହୀ ହେବେ | ଆମ ସରକାରଙ୍କ କ୍ରୀଡାବିଭାଗ ଏଦିଗରେ ସଚେତନ ହୋଇ ଆଗାମୀ ଦିନମାନଙ୍କରେ ଏହି ଖେଳ ପ୍ରତିଯୋଗିତା ରାଜ୍ୟର ବିଭିନ୍ନ ସ୍ଥାନରେ ଆୟୋଜିତ କରିବା ପାଇଁ ଅନୁରୋଧ କରୁଛି |

*******

ଆମ ଦୁନିଆରେ ଏମିତି ବାରମ୍ବାର ହୁଏ -- କାହାର ନ୍ୟାଯ୍ୟ ଅନୁରୋଧ ସଂପୃକ୍ତ ବ୍ୟକ୍ତି ଆଖି ପିଛୁଳାକେ ମୁଣ୍ଡରୁ ମୂଳପୋଛ କରି ଦିଅନ୍ତି ।

********

ଆମ ପିଲାଦିନର ବଣଭୋଜି ପାଇଁ ଭଡା ବସ୍ ରେ ଚାରି ଘଣ୍ଟା ଯାତ୍ରା ଦରକାର ହେଉ ନ ଥିଲା ।  ଦିନ ସାଢେ ତିନିଟା ବେଳେ ଖାଇବା ହେବାକୁ ଯାଉଛି ଜାଣି ବି ଭୋକ ଲାଗୁ ନଥିଲା । ପେଜୁଆ ଭାତ ହେଉ ବା ଦରପୋଡା ଡାଲମା ବା ଦରସିଝା ମାଉଁସ ତରକାରୀ --  ସବୁ ଅମୃତ ଭଳି ଲାଗୁଥିଲା । ବାସନ ମାଜିବା ରେ ଲାଜ ଲାଗୁ ନଥିଲା । ଆଜି ଇକୋ ରିଟ୍ରିଟ ରେ ସରକାର ଅତିଥିଙ୍କୁ ରନ୍ଧାଭୋଜନ ଯୋଗେଇବା ବ୍ୟବସ୍ଥା କରିଥିବା ଖବର ପ୍ରକାଶିତ ହେଇଚି | ତେବେ ଏଇ ବ୍ୟବସ୍ଥା କୁ କଣ ବଣଭୋଜି କୁହାଯିବ ? ବଣଭୋଜିର ନିଜେ ଜାଳେଣି ଯୋଗାଡ଼ କରନ୍ତି ; ନିଜେ ରାନ୍ଧନ୍ତି ; ନିଜେ ବାସନ ମାଜନ୍ତି ; ଗଛତଳେ ଖବରକାଗଜ ନହେଲେ ଚାଦର ପକେଇ ଖଲି ପତରରେ ଖାଆନ୍ତି |

*******

"ନା ଷଣ୍ଢ ଖାଇବେ ନା ମାଙ୍କଡ଼,ସେଇଥିପାଇଁ ବିଲରେ କେବଳ ସାଗ କରିଛି । ବାଉଁଶ ବାଡ ଦେଇଥିଲି,ଟଙ୍କା ଦିହଜାର ଖର୍ଚ୍ଚ କରି, ପରିବା କରିବା ପାଇଁ । ଷଣ୍ଢ ଭାଂଗିଦେଲେ। କଙ୍କ୍ରିଟ ଖୁଣ୍ଟ , ଲୁହା କଣ୍ଟାତାର ଦେଲେ ହେବ, କିନ୍ତୁ ଅନ୍ୟ ଜଣଙ୍କ ବିଲ ରେ ପରିବା କରୁଛି ; କେତେଦିନ ମାଲିକ ଜମି ଦେବ ଠିକ ନାହିଁ | ତେଣୁ ଏତେ ଖର୍ଚ୍ଚ କରିବା ପାଇଁ ସାହାସ ହେଲାନି  ।" ଆଜି ସକାଳେ ଭିଙ୍ଗାରପୁର ବ୍ଲକ ର ବେଂଟପୁର ଗାଁର ଲାଗୁଆ ନଡିଆ ତୋଳାଳି କହୁଥିଲା ।

*******

କରୋନା ମହାମାରୀ ପାଇଁ ଅନେକ ବ୍ୟବସାୟ,ଅନୁଷ୍ଠାନ, ସଂସ୍ଥା  କୁ ଯିବା ବାରଣ କରାଗଲା | ଏହି ନିୟମ ଦେଶବ୍ୟାପୀ ଲାଗୁ ହେଲା | ଧର୍ମାନୁଷ୍ଠାନ ମଧ୍ୟ ବନ୍ଦ ରହିଲେ | ଭଲକଥା | କିନ୍ତୁ ଧୀରେଧୀରେ କଟକଣା ମାନଙ୍କୁ କୋହଳ କରାଗଲା | ମଦ ଦୋକାନ ଖୋଲିଲା ; ମଲ ଖୋଲିଲା ; ଅନେକ ରାଜ୍ୟରେ ଧର୍ମାନୁଷ୍ଠାନ ମଧ୍ୟ ଖୋଲିଲା | କିନ୍ତୁ ଆମ ଓଡ଼ିଶାରେ ଧର୍ମାନୁଷ୍ଠାନ କ୍ଷେତ୍ରରେ ବ୍ୟତିକ୍ରମ ହେଲା | ଏଯାଏଁ ସବୁ ବନ୍ଦ ରହିଛି |   କାଇପଦର ବାବା ବୁଖାରି ପୀର ଙ୍କ ପାଖକୁ ଯାଇହବନି ; ନା ଭୂଷଣ୍ଡପୁର ମା ଉଗ୍ରତାରା ଙ୍କ ପାଖକୁ; ନା ବାଙ୍କି ମା ଚର୍ଚ୍ଚିକାଙ୍କ ପାଖକୁ; ନା ବାଣପୁର ମା ଭଗବତୀ | ଏମିତିକି ମା କଟକଚଣ୍ଡୀ ବି ମନା ; ଆରଡ଼ି ର ଆଖଣ୍ଡଳମଣି ବି ; ଭବାନୀପାଟଣାର ମା ମାଣିକେଶ୍ବରୀ ; ସମ୍ବଲପୁର ର ମା ସମଲେଇ ଠାକୁରାଣୀ , ଧାମନଗର ଦରଘା ବି ମନା | ବୁଝିପାରୁନି ଏମିତି କାହିଁକି ? ଆମ ଠାକୁର, ଠାକୁରାଣୀ ଆମ ପୀର ବାବା ଆମକୁ ପିଲାଦିନୁ ଦେଖିଛନ୍ତି ; ତାଙ୍କ ଆଶୀର୍ବାଦରେ ଆମେ ଗଢ଼ା ହେଇଚୁ | ସେମାନେ   ଆମକୁ ପରିଚାଳିତ କରୁଛନ୍ତି | ଏମାନଙ୍କ ବିନା ଓଡ଼ିଆ ବଂଚିବ କେମିତି ? ମୁଁ ସେମାନଙ୍କ କଥା କହୁନି ଯେଉଁମାନେ  ଡରି ଘରେ ଲୁଚି ରହୁଛନ୍ତି |

*******

 

 

ଅଗଷ୍ଟ ୨୦୨୦ ର ଦ୍ଵିତୀୟ ପକ୍ଷ ର କେତୋଟି ପ୍ରାସଙ୍ଗିକ ଟିପ୍ପଣୀ

ସକାଳେ ସୂର୍ଯ୍ୟଙ୍କୁ ଜଳ ଅର୍ଘ୍ଯ ଅର୍ପଣ କରିବା ସମୟରେ ଆମେ ଧଳା ମନ୍ଦାର ଫୁଲ ଅର୍ପଣ କରିବାକୁ ଭଲପାଉ। ଆମ ବଗିଚାର ଗୋଟିଏ କୋଣରେ ଗଛଟିଏ ଅଛି ଏବଂ  ଗଛରେ ଏବେ ପ୍ରତିଦିନ ଦୁଇଟି ଫୁଲ ଫୁଟୁଛି । ଆଜି (ଅଗଷ୍ଟ ମାସ ପନ୍ଦର ତାରିଖ )  ବୋଧହୁଏ ବର୍ଷା ରେ ଖୁସି ହେଇ ଗଛଟି ତିନୋଟି ଫୁଲ ଦେଇଥିବା ଦେଖି ମୁଁ ଭାବିଲି ତୃତୀୟ ଫୁଲ ଟି ଗଛ ତରଫରୁ ସୂର୍ଯ୍ୟ ଙ୍କୁ ଅର୍ପଣ କରିବା ବୋଧହୁଏ ଉଚିତ ହେବ।
*****

ସରକାର ରାଜକୋଷରୁ ଅର୍ଥ ବ୍ୟୟକରି ପେଷାଦାର ଚିତ୍ରକାରଙ୍କ ଦ୍ୱାରା ପ୍ରସ୍ତୁତ କାଳ୍ପନିକ ନକ୍ସା/ଚିତ୍ର ମାଧ୍ୟମରେ ବରମୁଣ୍ଡା ବସ୍ ଟର୍ମିନାଲ, ଶ୍ରୀ କ୍ଷେତ୍ର,  ସ୍ୱର୍ଗଦ୍ୱାର,  ଏକାମ୍ର କ୍ଷେତ୍ର ଇତ୍ୟାଦି ପ୍ରକଳ୍ପ ମାନଙ୍କର ସମ୍ଭାଵ୍ୟ ରୂପ ପ୍ରଦର୍ଶନ କରୁଛନ୍ତି । ଏହି ପ୍ରୟାସ କେତେଦୂର ଆବଶ୍ୟକ ତାହା ବିଚାର୍ଯ୍ୟ | ମୋର କିନ୍ତୁ ମନେହୁଏ ଏହା ଅନାବଶ୍ୟକ ଏବଂ ସରକାରୀ ଅର୍ଥର ଅପବ୍ୟୟ | ବରଂ ପ୍ରକଳ୍ପମାନ ଶୀଘ୍ର ଆରମ୍ଭ ହୋଇ ଶୀଘ୍ର ସମ୍ପୂର୍ଣ୍ଣ ହେଲେ ସରକାରଙ୍କ ସାମର୍ଥ୍ୟ ପ୍ରଦର୍ଶିତ ହେବା ସଂଗେ ସଂଗେ ଜନମଙ୍ଗଳ ହୋଇପାରନ୍ତା | ଆଶ୍ଚର୍ଯ୍ୟ ବିଷୟ ଯେ ଆମ ଲୋକପ୍ରିୟ ନବୀନ ସରକାର ଦୁଇ ଦଶନ୍ଧିରୁ ଅଧିକ କାଳ କ୍ଷମତାରେ ରହି ମଧ୍ୟ ଆମ ଗାଁ ସ୍କୁଲ ମାନଙ୍କର  ଗୁଣାତ୍ମକ ବିକାଶ କରି ପାରିଲେନି | ଅବଶ୍ୟ ଅନେକ ସ୍କୁଲ ଚଟାଣ ରେ ଟାଇଲ ଲାଗୁଚି; ଯେଉଁଠି ହୁଏତ ଛାତ ରେ ଫଲସ ସିଲିଂ ଲାଗୁଚି | କିନ୍ତୁ ଗାଁ ବିଦ୍ୟାଳୟ ର  ଏକ ଅନନ୍ୟ ପରିଚୟ ସୃଷ୍ଟି ହେଉନି | ଯଦି ହୋଇପାରନ୍ତା, ତେବେ ଏହା ନବୀନ ସମର୍ଥକମାନଙ୍କୁ ଆନନ୍ଦିତ କରନ୍ତା | ବିଦ୍ୟାଳୟର ସମସ୍ତ ଆବଶ୍ୟକତା ପାଇଁ ଉପଯୁକ୍ତ ବ୍ୟବସ୍ଥା ଥିବା ଏକ ସୁରୁଚି ସମ୍ପନ୍ନ; ଉନ୍ନତ ମାନ ର  ସୌଧ ର ନକ୍ସା ର ଆବଶ୍ୟକତା ରହିଛି ; ନକ୍ସା ପ୍ରସ୍ତୁତ ହେବା ପରେ ଶୀଘ୍ର ଏହିଭଳି ସ୍କୁଲ ଗୃହ ନିର୍ମାଣ ହେଉ, ପ୍ରତ୍ୟେକ ଗାଁ ର ପରିଚୟ ଗାଁ ସ୍କୁଲ ରୁ ହେଉ | ଏହି ସ୍କୁଲ ରେ କମ୍ପ୍ୟୁଟର ବ୍ୟବସ୍ଥା ହେଉ ; ସୌରଶକ୍ତି ବ୍ୟବହାର ହେଉ ; ଭିଡିଓ ମାଧ୍ୟମରେ ଶିକ୍ଷା ପ୍ରଦାନ ସୁବିଧା ରହୁ | ଆବଶ୍ୟକତା ଅନୁଯାୟୀ  ଶିକ୍ଷକ ନିୟୋଜିତ ହୁଅନ୍ତୁ  |  ଏହା ଶିକ୍ଷା ପ୍ରସାରରେ ସହାୟକ ହେବ |
ବହୁ ବିଳମ୍ବ ହେଲାଣି ; ଆଉ ଅଧିକ  ବିଳମ୍ବ ନହେଉ |
******

କାଲି (ଅଗଷ୍ଟ ୨୨ ତାରିଖ) ଶନିବାର, କାଲି ମଧ୍ୟ ଗଣେଶ_ଚତୁର୍ଥୀ | ଓଡ଼ିଶାର ଅସଂଖ୍ୟ ଛାତ୍ରଛାତ୍ରୀ  ଖାତା,ବହି ; କଲମ, ପେନସିଲ, ଘର ଗଣେଶ ମୂର୍ତ୍ତି ପାଖରେ ରଖି ପୂଜା କରିବେ ; ଭୋଗ, ପୁଷ୍ପାଞ୍ଜଳି ଦେବେ | ଏଇ ପ୍ରଥା ଆମ ସଂସ୍କୃତି ର ଏକ ଅଙ୍ଗ | କିନ୍ତୁ ସରକାର ଫୁଲମାଳ ଟିଏ କିଣିବା ପାଇଁ ସୁଯୋଗ ଦେବେନି; କାରଣ କାଲି ସଟଡାଉନ  ନ ହେଲେ ଲକଡାଉନ | ଏମିତି ଅବିମନୁଷ୍ୟତା କାହିଁକି ?
******

ପ୍ରତିବାଦ ଗଣତନ୍ତ୍ର କୁ ପରିପୃଷ୍ଟ କରିଥାଏ ; ଶୋଧନ ପାଇଁ ମାର୍ଗଦର୍ଶକ ହୋଇଥାଏ | ଗଣତନ୍ତ୍ରରେ ବିଶ୍ୱାସ କରୁଥିବା ବ୍ୟକ୍ତି ପ୍ରତିବାଦ କୁ ସମ୍ମାନ ପ୍ରଦର୍ଶନ କରେ; ଭୃକୁଞ୍ଚନ କରେନାହି ବା ପ୍ରତିଶୋଧ ପରାୟଣ ହୁଏ ନାହିଁ | (ଅଗଷ୍ଟ ୨୪, ୨୦୨୦)
******

"ଚାଷୀ ବିଲରୁ  ଭେଣ୍ଡି ଦୁଇଦିନ ନ ତୋଳିଲେ ଭେଣ୍ଡି ତକ ବୁଢା ହେଇଯିବ । ଲୋକସେବକ ମାନେ ଲୋକ ସେବା ଭବନରୁ ଏହା ବୁଝି ପାରୁ ନାହାନ୍ତି । ଶନିରବି ଅଲବତ ବଂଦ ହେବ । ଶୁକ୍ରବାର ସଂଧ୍ୟାରେ ଭିଡ ହେଉ . ଠେଲାଠେଲି ହଉ, ପରବାୟ ନାହିଁ ।" ମୁଁ ଦୁଇ ଗଜ ଦୂରରୁ ମୁହଁରେ ମୁଖା ଲଗେଇ  ଦୋକାନୀ କଥା ଶୁଣୁଥିଲି। (ଅଗଷ୍ଟ ୨୪, ୨୦୨୦)
******

ଉତ୍କର୍ଷ ଏକ ସାମର୍ଥ୍ୟ, ଏହା ବ୍ୟକ୍ତିଗତ ସ୍ତରରେ ହେବା ସ୍ୱଭାବିକ, କିନ୍ତୁ ସାମୁହିକ ସ୍ତରରେ ଉତ୍କର୍ଷ ସମାଜ ଏବଂ ଜାତିକୁ ଉନ୍ନତ କରେ ଏବଂ ସରକାର ଙ୍କ ସାମର୍ଥ୍ୟ ପ୍ରତିପାଦନ କରିଥାଏ । ସରକାର କିନ୍ତୁ ବ୍ୟକ୍ତିଗତ ସ୍ତରରେ ଉତ୍କର୍ଷ କୁ ପୁରସ୍କୃତ କରି ନିଜର କର୍ତ୍ତବ୍ୟ ସଂପାଦନ କରିବା ମନୋବୃତ୍ତି ପ୍ରଦର୍ଶନ କରିଥାନ୍ତି । (ଅଗଷ୍ଟ ୨୫,୨୦୨୦)
*****

ଆମ ରାଜ୍ୟରେ ଆଉ କିଛି ହେଉ ନ ହେଉ , "ବୋଲେ ହୁଁ ଟି " ମାନସିକତା ବୈଶାଖ ର ବନାଗ୍ନି ଭଳି ହୁ ହୁ ହେଇ ମାଡି ଯାଇଛି । ଏହାର ବିଷମ ପରିଣତି ସଂପର୍କରେ ଆମ ଯୁବାପିଢି ସଚେତନ ହେବା ନିତାନ୍ତ ଆବଶ୍ୟକ ମନେହୁଏ । (ଅଗଷ୍ଟ ୨୬,୨୦୨୦)
*****

ଆମେ ରାଜ୍ୟର ଅନୁକୂଳ ପରିବେଶର ସୁଯୋଗ ନେଇ ବ୍ୟାପକ ସ୍ତରରେ ଚାହା, କଫି, ଗୋଲମରିଚ, ଡାଲଚିନ, ଅଳେଇଚ ଚାଷ କରିବା ନା ନିଜ ସାମର୍ଥ୍ୟକୁ ଗଂଜେଇ ଚାଷ ଓ ତାହାର ଚୋରା ଚାଲାଣରେ ସୀମିତ ରଖିବା ? ଆମେ ରାଜ୍ୟର ଅନୁକୂଳ ପରିବେଶର ସୁଯୋଗ ନେଇ ଗୋପାଳନ କରି ନିଜ ସନ୍ତାନଙ୍କୁ ଯଥେଷ୍ଟ କ୍ଷୀର ଦେବା ନା ମଦ୍ୟପାନରେ  ନିଜର  ସମ୍ବଳକୁ ନଷ୍ଟ  କରିବା? (ଅଗଷ୍ଟ ୨୭,୨୦୨୦)
******

ଜେଇଇ ଏବଂ ଏନ୍ଇଇଟି ରେ ଭାଗ ନେଉଥିବା ଓଡିଶା ର ଛାତ୍ର ଛାତ୍ରୀ ମାନଙ୍କୁ ଶୁଭକାମନା ଜଣାଉଛି । ଈଶ୍ବର ସେମାନଙ୍କ ମଙ୍ଗଳ କରନ୍ତୁ , ତାଙ୍କର ପ୍ରତିଭା ସର୍ବଭାରତୀୟ ସ୍ତରରେ ପ୍ରଦର୍ଶିତ ହେଉ। ଆମ ବିଦ୍ୟାର୍ଥୀ ସମାଜ ପରୀକ୍ଷା ପ୍ରତି ଉଦାସୀନ ନ ହୁଅନ୍ତୁ। ସଂଘର୍ଷମୟ ଜୀବନରେ ପରୀକ୍ଷା ସାମର୍ଥ୍ୟ ପ୍ରଦର୍ଶନ ପାଇଁ ଏକ ସୁଯୋଗ । (ଅଗଷ୍ଟ ୨୯,୨୦୨୦)
*****

INDEPENDENCE DAY, 2020

It was still raining in the morning; though it wasn't like it rained around past midnight last night. I needed to buy some vegetables and I need to buy some medicines. Someone in the nearby pharmacy confirmed over phone that the shop was open and the require medicine too was available. I decided to drive first to the vegetable vendor. As always, he received me with respect and wondered why I chose to come himself while it was raining. I should have contacted his son over phone, he said, and the boy would have delivered the vegetables at home. I had to explain that I needed to go elsewhere and hence decided to get the vegetables from his shop. I was short of change. He let me go after I had paid him hundred rupees though he ought to get ten rupees more. I reached the pharmacy. A Boy in the Pharmacy had kept my medicines ready. I was the lone customer around seven thirty in the morning. I paid through my card but I needed some change. I wasn't sure if the boy would oblige me. I asked if he would give me change for five hundred rupees. He agreed. I got the change as per my specifications. I drove to the vegetable vendor & paid him ₹10/- I owed. He was annoyed that I drove the car myself again for this small thing.
This experience with two common men of my country on Independence Day confirmed how this world is still a beautiful place to dwell in because of people like the pharma boy and the vegetable vendor; we need to learn a lot from people who we generally take for granted. Our system needs to give more power to such people to make my country a lot more humane and warm place to live in.
Sadly, craving for justice by the common man only keeps growing as Independent India grows older.
I am always proud of those Revolutionaries who either got killed or spent life in cellular jail till death for what they did for making our country independent years before 1947.

*********

SOME THOUGHTS ON AUGUST, 13, 2020

1. We seem to focus on programming the mind to manage "failures"-- thereby weaving a safety net for poverty not only to be protected but to grow; whereas perhaps a right approach would be to tune our mind to manage "success" and look at poverty as an impediment to growth.

2. So far, Hindi film "Tamas" (released in 1988) has been the longest -- 2 minutes short of 5 hours. Film"LoC Kargil", released in 2003, was also a long picture, running for 255 minutes. So was the celebrated film "Mera Naam Joker", released in 1970 that was 244 minute long. For years, however, television serials running short episodes almost daily has been conditioning viewers' mind . Mind is getting tuned to watching about 25 minute long episodes. In many cases, span of attention is shrinking. This is the reason why watching a film is not interesting for me- average length of a film being about 100 minutes.

3. Let our biggest temptation not be to keep within us the knowledge we have. Ancient India's wise have been believers in sharing knowledge. They passed on knowledge from one generation to the next through "Shruti". This Indian legacy must continue. An educated Nation is always a strong one ; it ensures holistic development, both of mind and material.

4. Let's not revert to relaxing mode. The vaccine against COVID 19 , to be available to you and me, is still months away. Let's be optimistic ; but we should be realistic as well. It pays to keep the seat belt in a fastened mode. We may be hit by turbulence suddenly.

*********
August 13, 2020

ସକାଳର ମୁଢି ବିକାଳି

ଆମ ଘର ପାଖରେ ଯେଉଁ କେନାଲ ଜନ୍ମ ହେବାର ମାତ୍ର କିଛିବର୍ଷ ପରେ ମୃତ୍ୟୁବରଣ କଲାପରେ ଏକ ଉଗ୍ର ନର୍ଦମା ଓ ଆବର୍ଜନା କୁଣ୍ଡରେ ପରିଣତ ହେଇ ପରିବେଶର ରୁଗ୍ଣତାକୁ ତ୍ୱରାନିତ୍ବ କରୁଛି ସେହି କେନାଲ କୂଳରେ ଗୋଟିଏ ମୁଢି ତିଆରି କାରଖାନା ଥିବା କୁହାଯାଏ | ଏହାର ପ୍ରଶସ୍ତି ସୁଦୂରପ୍ରସାରୀ | ମନେହୁଏ ମୋ ବ୍ୟତୀତ ଆମ ଅଂଚଳର ସମସ୍ତେ ଏହି କାରଖାନା ହୁଏତ ଦେଖିଛନ୍ତି ବା ଏହା ସମ୍ପର୍କରେ ବିସ୍ତୃତ ତଥ୍ୟ ସଂଗ୍ରହ କରିଛନ୍ତି |ଆଜି ସକାଳ ଛ ଟା ବେଳେ ଦେଖିଲି ଆମଘର ସାମନା ନିରୋଳା ରାସ୍ତା ରେ ନିଜ ସାଇକଲକୁ ଧୀରେ ଚଳେଇ ଲୋକଟିଏ "ମୁଢି, ମୁଢି" ଡାକ ଡାକି ରାସ୍ତାର ଦୁଇ ଆଡ଼କୁ ନଜର ପକେଇ ଗ୍ରାହକ ଖୋଜୁଛି | ପ୍ରାୟ ପାଞ୍ଚଫୁଟ ଲମ୍ବା ମୁଢ଼ି଼ବସ୍ତା ଟିଏ ସାଇକଲ ପଛରେ ଶୋଇଛି ; ମୁଆଁ ଗୁଡିଏ ଜରି ବ୍ୟାଗ ରେ ସାଇକଲ ହ୍ୟାଣ୍ଡଲ ରୁ ଓହଳିଛନ୍ତି | ଘର ଗେଟ ପଛରେ ଠିଆହୋଇ ତାକୁ ଡାକିଲି | ସେ ତତକ୍ଷଣାତ ସାଇକଳରୁ ଓଲ୍ହେଇ ଗେଟ ପାଖକୁ ଆସିଲା | କରୋନା ମହାମାରୀ ପରିପ୍ରେକ୍ଷୀରେ ସାବଧାନତା ଅବଲମ୍ବନ କରିବାକୁ ପରାମର୍ଶ ଦେଲି | ଘର ତାର ଢେଙ୍କାନାଳ ଜିଲା ଭୁବନ ପାଖ ଗୋଟିଏ ଗାଁରେ | "ବ୍ରାହ୍ମଣୀ ସେଠି ଭାରି ଚଉଡା |" ମୋର ଏହି ବକ୍ତବ୍ୟ ତାକୁ ଆନନ୍ଦିତ କଲା | ମନେହେଲା ତା ଘର ଆଖପାଖ ସହ ମୋର ପରିଚିତି ତାକୁ ମୋ ସହିତ ଏକ ବନ୍ଧନରେ ବାନ୍ଧୁଛି | ମୋ ପ୍ରତି ସମ୍ମାନ ଓ ବିଶ୍ୱାସ ତା ହୃଦୟରେ ଅଙ୍କୁରିତ ହେଉଥିବା ଅନୁଭବ କଲି |ପକେଟ ରୁ ଗୋଟିଏ ହୋମିଓପାଥି ଔଷଧ ବୋତଲ ବାହାରକଲି | ଆର୍ସେନିକ ଆଲବୁମିନ ୩୦ ଔଷଧ ସରକାର କରୋନା ପରିପ୍ରେକ୍ଷୀରେ ସେବନ କରିବା ପାଇଁ ଅନୁମୋଦନ କରିଛନ୍ତି | ସେ ଓ ତା ପରିବାର ଏହି ଔଷଧ ଖାଇବାକୁ ଅନୁରୋଧ କଲି | ସେ ସହମତ ହେଲା | "ମଦ ଖାଉଛ କି ନାହିଁ ?" ମୁଁ ପଚାରିଲି | ସେ ମନାକଲା ; କିନ୍ତୁ ପର ମୁହୂର୍ତ୍ତରେ କହିଲା, "ମାସେ ଦୁଇମାସରେ ଭୋଜିଭାତରେ ପିଇଦିଏ |" ମୁଁ ତାକୁ ଏପରି ନକରିବା ପାଇଁ ଅନୁରୋଧ କଲି | ସେ କହିଲା " ଆପଣ କହିଲେଣି, ମୁଁ ନିଶ୍ଚୟ ମାନିବି |" ଏହା କହି ସେ ଚାଲିଗଲା |ସକାଳର ଏହି ଅନୁଭୂତି ମୋତେ ଉତ୍ଫୁଲ୍ଲିତ କରିଥିଲା | *******

ଝରକଲମ, ପରକଲମ, କାଠକଲମ

ପିଲାଦିନେ ଲେଖିବା ପାଇଁ ଗୋଟିଏ/ଦୁଇଟି କାଳିବଟିକା ପାଣିରେ ମିଶେଇ ଦୁଆତରେ ରଖାଯାଉଥିଲା | କାଠ ହ୍ୟାଣ୍ଡଲରେ ନିବ ଲଗେଇ କଲମ ପ୍ରସ୍ତୁତ ହେଇଥିଲା | ଝରକଲମ ବ୍ୟବହାର ପରେ ଆସିଲା | ତା ପୂର୍ବରୁ ପରକଲମ ବ୍ୟବହାର ହେଉଥିଲା | ଆଜି ପରକଲମ ଆଉ ଦୁଆତରେ ବଟିକା ପ୍ରସ୍ତୁତ କାଳି ବ୍ୟବହାର କରି ଲେଖିବା ଗୋଟିଏ ରୋମାଞ୍ଚକର ଶଉକ ହେଇ ପାରନ୍ତା |

ଲାପଟପ ବା ସ୍ମାର୍ଟଫୋନ ରେ କିଛି ଲେଖି ଆତ୍ମସନ୍ତୋଷ ଲାଭ କଲା ପରେ ଗୋଟିଏ ଏ ଫୋର ସାଇଜ ଧଳା କାଗଜରେ ଗୋଟିଏ ପୃଷ୍ଠା ନିଜ ହାତରେ କଲମରେ ଛୋଟଛୋଟ ଅକ୍ଷରରେ ଦିନଲିପି ବା ଅନ୍ୟକିଛି ଲେଖିବା ଅଭ୍ୟାସ କରିବାକୁ ଯେତେ କହୁଛି, ଶ୍ରୋତାମାନେ ମୁଚୁକି ହସି ମୁହଁ ବୁଲେଇ ଦେଉଛନ୍ତି |

ଟିଭି ହେଉ ବା ସିନେମା , ହିରୋଂକ ଡାଇଲଗ ଶୁଣି ମୁଖସ୍ତ କରି ଦେଉଛନ୍ତି ; କିନ୍ତୁ ନିଜ ମନକୁ ଦଶ ମିନିଟ ମାତୃଭାଷାରେ ସାବଲୀଳ ଢଙ୍ଗରେ କିଛି କହିବା ଅଭ୍ୟାସ କରିବା ଅନୁରୋଧ ମଧ୍ୟ ସେହି ଦଶା ଭୋଗ କରୁଛି |
******

BEE AND THE EARTHWORM

The Earthworm never took or got credit for the Farmer's rich harvest.; nor was the Bee ever offered a garland on the stage for being responsible for pollinating nearly 85% of all food crops for humans.

******

ଆମର ସବୁ ଜିନିଷ ଆବଶ୍ୟକ , କାରଣ ଆମେ ମନୁଷ୍ୟ |

ଆମେ  ବର୍ଷା ମାଗୁ ; ତା ପାଇଁ ପ୍ରାର୍ଥନା କରୁ ; ଈଶ୍ବର ଆଶୀର୍ବାଦ କରି ବର୍ଷା ଦିଅନ୍ତି | ଆମେ ଏଥର ବାଲି ଛତୁ ମାଗୁ ; ରାତ୍ରିର ବର୍ଷା ଓ ଘଡଘଡି-ବିଜୁଳି ପରେ ଅନେକ ଜାଗାରେ ବାଲିଛତୁ ଫୁଟି ଥିବା ଆମେ ଦେଖୁ ଓ ତା ସ୍ୱାଦ ଉପଭୋଗ କରୁ | ପୁଣି ଇଛାହୁଏ ଆହୁରି ଆନନ୍ଦ ପାଇଁ | ଆମେ ସାଧବ ବୋହୁ ପୋକ ଦେଖିବାକୁ ମନକରୁ | ଆମ ଇଛାର  ପରିସମାପ୍ତି ହୁଏନାହିଁ ; ନା ମାଗିବା ବନ୍ଦ ହୁଏ | କାରଣ ଆମେ ମଣିଷ | ଆମେ ଭୁଲିଯାଉ ଯେ ଆମର ଅସ୍ତିତ୍ବ ସୃଷ୍ଟି ପାଇଁ ଆଦୌ ଆବଶ୍ୟକ ନୁହେଁ | ପ୍ରତ୍ୟେକ ପ୍ରାଣୀ ସୃଷ୍ଟିର ବିକାଶ ପାଇଁ କର୍ମରତ -- ଯେଭଳି ଜିଆ ଟିଏ ଜମିର ଉର୍ବରତା ବୃଦ୍ଧି କରିଥାଏ ; ମହୁମାଛି ପରାଗ ସଙ୍ଗମ ରେ ସହାୟକ ହୋଇଥାଏ | ଜୀବଜଗତର ବିକାଶ ପାଇଁ ଆମେ ସମ୍ପୂର୍ଣ୍ଣ ଭାବରେ ଅନାବଶ୍ୟକ ; ଅଥଚ  ଆମର ସବୁ ଜିନିଷ ଆବଶ୍ୟକ , କାରଣ ଆମେ ମନୁଷ୍ୟ |

****

ଗୋପାଳର ବାଡ଼ି ପୋଟଳ

ଗୋପାଳ ଚନ୍ଦ୍ର ବେହେରା ଏକ ଆକର୍ଷଣୀୟ ବ୍ୟକ୍ତିତ୍ୱ | ଗୋପାଳ ନିଜ  ପରିବାର ସହିତ  ଆମ ଘର ପାଖରେ ଅନେକ ବର୍ଷରୁ ରହି ଆସୁଛି | ୧୯୮୨ ମସିହାରେ ଆମ ଘର  ନିହ ପଡିଲା ଦିନରୁ ଆମେ ତାକୁ ପଡୋଶୀ ଭାବରେ ଦେଖି ଆସୁଛୁ | ଅବଶ୍ୟ ସରକାରୀ ଜମି ଉପରେ ସେ ନିଜ ପାଇଁ ଓ ତା ଗାଈବାଛୁରି ମାନଙ୍କ ପାଇଁ ଅସ୍ଥାୟୀ ଗୃହ କରି ରହିଛି ଓ ନିଜ ଜୀବିକା ନିର୍ବାହ କରି ଆସୁଛି |  ଏହିଭଳି ଅନେକ ପରିବାର ଆମ ସହରରେ ବସବାସ କରନ୍ତି | ଆମ ଘରର ଭିତ୍ତି ପଡିବା ଅବସରରେ ଯେଉଁ ପୂଜା ହେଲା , ତା ପାଇଁ ଗୋବର ଓ କ୍ଷୀର ଗୋପାଳ ଆଗ୍ରହରେ ଯୋଗେଇ ଦେଇଥିଲା |ଅବସର ପରେ ଆମେ ନିଜ ଘରେ ରହିବା ପରେ ପ୍ରାୟ   ଅଠର ବର୍ଷ ହେଲା ସେ ଆମକୁ କ୍ଷୀର ଦିଏ। ଅମାୟିକ ବ୍ୟକ୍ତିତ୍ୱ ତାର | ଜୀବିକା ପାଇଁ ବହୁତ ପରିଶ୍ରମ କରେ | ସରକାରୀ ବ୍ୟବସ୍ଥାର ପାନୀୟ ଜଳ ସୁବିଧା ତା ଘର ପାଇଁ ସମ୍ଭବ ହେଇନଥିଲା | ଦିନକୁ ପ୍ରାୟ ଶହେ ବାଲଟି ପାଣି ସେ ପାଖ ନଳକୂପରୁ ଏବଂ ଆମ ଭଳିଆ କେତେଜଣ ପଡୋଶୀଙ୍କ ଘରୁ ନିଜ ଘରକୁ ନିଏ ପରିବାର ଓ ଗାଈ ବାଛୁରୀଙ୍କ ଆବଶ୍ୟକତା ପୂରଣ ପାଇଁ | ସଂଘର୍ଷମୟ ସଂସାରରେ କିନ୍ତୁ ମୁହଁରେ ତାର ସବୁବେଳେ ହସ ଥାଏ | ନିୟମିତ ଖାଣ୍ଟି କ୍ଷୀର ଦେବାକୁ ଆମେ ବରାବର  ତାଗିଦା କରୁ , ସେ ଶୁଣେ, ଆଉ ହସେ। ବେଳଅବେଳରେ ଗାଈଙ୍କ ଔଷଧ ପାଇଁ ହେଉ ବା ଗୋଖାଦ୍ୟ କିଣିବା ପାଇଁ ହେଉ , ଟଙ୍କା ଦରକାର ହୁଏ | କରଜ କରିବା ର ବିକଳ୍ପ ନଥାଏ | ଅସୁବିଧା କହି ଆମ ଭଳି କେତୋଟି ଗ୍ରାହକଙ୍କ ପାଖକୁ ଆସେ ] ଆମେ କ୍ଷୀର ଯୋଗାଣ ପାଇଁ ଅଗ୍ରିମ ଡିପୋଜିଟ ଭାବରେ ତାକୁ ଟଙ୍କା ଦେଇଥାଉ  |  ଆଜି  ମୁଖା ପିନ୍ଧି  ଅବେଳରେ ଆମ ଘରକୁ ଆସିଲା, ଭାବିଲି  ଟଙ୍କା ମାଗିବ । ସେ ହସି, ଜରି ବ୍ୟାଗ ଟିଏ ବଢେଇ କହିଲା " ଗାଁରୁ ବାଡି ପୋଟଳ କିଲେ ଆପଣଙ୍କ ପାଇଁ ଆଣିଛି ।"

********